Kaun Kehta Hai Mohabbat Ki Zubaan Hoti hai ?

Yeh Haqeeqat tou Nigaahon se bayaan hoti hai

Kissi Din...

Chehrey pe merey Zulf ko Phailaao kissi Din
Kiya Roz garaj-tey ho, baras jaao kissi Din

Raazon ki tarha utro merey Dil mein kissi shab
dastak pe merey haath ki khul jaao kissi Din

Phoolon ki tarha "husn" ki baarish mein naha loon
Badal ki tarha jhoom ke ghir aao kissi Din

Khushboo ki tarha guzro merey Dil ki gali say
Phoolon ki tarha mujh pe bikhar jaao kissi Din

Phir haath ko khairaat miley bund qaba ki
Phir Lutf -e- shab-e-wasl ko dohraao kissi Din

Guzrein jo merey ghar sey tou ruk jaaein Sitaarey
Iss tarha meri Raat ko chamkaao kissi Din

Mein Apni har aik saans ussi raat ko dey doon
sar rakh ke merey seeney pe so jaao kissi Din

(Amjad Islam Amjad)

 

A PRAYER
Na shikaayatein, na gilaa karey
Koi aisa shakhs hua karey
Jo merey liye hee saja karey
Mujh hee sey Baatein kiya karey

Kabhi royey jaaey woh bepanaah
Kabhi be-tahaasha udaas ho
Kabhi chupkey chupkey dabey qadam
Merey peechay Aa kar, hansa karey

Meri qurbatein, meri chaahatein
Koi yaad kare qadam qadam
Mein taveel safar mein hoon agar
Meri waapsi ki Dua karey
 

Aik Baat Kahoon ?
Aik baat kahoon Agar suntey ho ?
Tum Mujh ko achey lagtey ho

Kuch chanchal se , kuch chup chup se
kuch pagal pagal lagtey ho

hain chahney waaley aur buhut
par tum mein hai aik baat buhut.............
Tum apney apney lagtey ho

Aik baat kahoon Agar suntey ho ?
Tum Mujh ko achey lagtey ho

Yeh baat baat pe kho jaana
kuch kehtey kehtey ruk jaana

yeh kiss uljhan mein rehtey ho....?
Kiya baat hai hum se keh daalo

Aik baat kahoon Agar suntey ho ?
Tum Mujh ko achey lagtey ho
(Nasir Kazmi )

Tum Raaz Agar Hotey...
Tum Raaz agar hotey, Mein Dil mein chhupa leti
Muskaati hui Aankhein, aelaan na bun jaaein
Jab naam tera aata, Palkon ko jhuka leti

Tum meri taraf chal kar, jiss raah se bhi aatey
Hur simt meri Aankehin, qadmaon ke taley paatey
Aik meethi hansi , hans kar , sow phool khilaa jaatey
Yeh Phool Utha leti, Rangon mein naha leti
Tum Raaz agar hotey, Mein Dil mein chhupa leti
Tum meri umeedon ki kashti ke liyey Saahil
manzil ke liyey Rusta, Aankhon ke liyey Kajal
Tum Dhoop mein jab aatey, bun jaati waheen Badal
Aawaaz agar hotey, Geeton mein saja leti
Tum Raaz agar hotey, Mein Dil mein chhupa leti
(Amjad Islam Amjad )
__________________________________________________________________________

GHAZAL
Suna Hai Loug "Ussey" Aankh bhur ke dekhtey hain
So "Uss" ke Sheher mein kuch din theher ke dekhtey hain

Suna hai boley tou baaton se phool jhartey hain
yeh baat hai tou chalo baat kar ke dekhtey hain

Suna hai Raat ko ussey Titliyaan sataati hai
Suna hai Raat ko Jugnoo theher ke dekhtey hain

Suna hai uss ke badan ki taraash aisi hai
ke phool apni qabaaein katar ke dekhtey hain

Rukey tou gardishein uss ka tawaaf karti hain
chaley tou uss ko zamaaney theher ke dekhtey hain

Kissey naseeb ke be-pairahan ussey dekhey
kabhi kabhi dar-o-deewaar ghar ke dekhtey hain

kahaaniyaan hi sahi , sab mubaalghey hi sahi
agar "woh" khawaab hai , "Taabeer" kar ke dekhtey hain

Judaaiyaan tou muqadder hai phir bhi jaan-e-safar
kuch aur door zara saath chal ke dekhtey hain

"Toou" saamney hai tou phir kiyon yaqeen nahin aata
yeh baar baar jo aankhon ko mal ke dekhtey hain

yeh kaun loug hain maujood teri mehfil mein
jo Laalachon se Tujhey ....Mujh ko jal ke dekhtey hain

Na tujh ko maat hui hai na mujh ko maat hui
So Ab ke donon hi chaalein badal ke dekhtey hain

Buhut dinon se nahin hai kuch "Uss" ki khair khabar
chalo Faraaz ko, Aey Yaar chal ke dekhtey hain
( Ahmed Faraz )

 

GHAZAL

Barson ke baad dekha, Aik shakhs Dilruba saa
Ab zehen mein naheen hai , per naam tha bhala saa

Ubroo khichey khichey sey, Aankhain jhuki jhuki see
Baatein ruki ruki see , Lehja thaka thaka saa

Alfaaz thay ke Jugnoo, awaaz ke safar mein
Bun jaaey jungalon mein jaisey ke Raasta saa

Khawabon mein khawab Uss ke, Yaadon mein yaad uss ki
Neendon mein ghul gaya ho jaisey ke rat-jaga saa

Pehley bhi zindagi mein, kitney hee loug aaey
Woh her tarha sey lekin, auron sey tha juda saa

Agli muhabboton ne, woh na-muraadian deen
Taaza Rifaaqaton sey, Dil tha dara dara saa

Kuch yeh ke muddaton se, Hum bhi nahi thay roey
Kuch zeher mein bujha tha, ahbaab ka dilaasa

Ab such kahein tou yaaro, Hum ko khaber naheen thi
Bun jaaey ga qayamat, Aik waaqaya zara saa

Tewer thay berukhi key, andaaz dosti key
Woh ajnabi tha laikin, lagta tha Aashna saa

 

Suhaag Raat

Aaaj ki Raat muraadon ki Baraat aai hai

Aaj ki raat nahin shikwey, shikayat ke liyey
Aaj hur lamha, hur aik pal hai Mohabbat ke liyey
Reshmi saij hai, mehki hui Tanhaai hai
Aaaj ki Raat muraadon ki Baraat aai hai

hur Gunaah aaj Muqaddas hai Farishton ki tarha
Kaanptey haathon ko mil jaaney do Rishton ki tarha
Aaj milney mein na uljhan hai, na ruswaai hai
Aaaj ki Raat muraadon ki Baraat aai hai

Apni zulfein merey Shaaney pe bikher jaaney do
Iss haseen raat ko kuch aur Nikher jaaney do
Subha ne aaj Na aaney ki Qasam khaai hai
Aaaj ki Raat muraadon ki Baraat aai hai

(Sahir Ludhyaanvi )
 

KUNGAN ( bracelet)

kaash mein terey haseen haath ka kungan hota

Toou barey chaao se, barey maan ke saath…
apni nazuk si kalaai mein charhati mujh ko
aur betaabi se furqat ke khizaan lumhoon mein ….
Toou kissi soch mein doobi jo ghumaati mujh ko…
Mein terey haath ki khusboo se mehek sa jata

Jab kabhi mood mein aa kar mujhey chooma karti
Terey honton ki mein hiddat se dehek sa jata

Raat ko jub bhi toou neendon ke safar par jati…
Murmareen haath ka ek takiya banaya karti
Mein terey kaan se lug kar kai baatein karta
Teri zulfon ko terey gaal ko chooma karta

Jub bhi tu bund qaba kholney lugti janaan
Apni aankhon ko terey husn se kheera karta

Mein teri rooh ke gulshan mein mehekta rehta
Mein terey jissem ke aangan mein khanakta rehta

Kuch nahin tu yahi be-naam sa bandhan hota
Kaash mein terey haseen haath ka kungan hota

Kaash mein terey haseen haath ka kungan hota….
(Syed Wasi Shah)
 

Jhumka ( Ear Ring)

Kaash mein terey Kaan ka Jhumka Hota

Raat ko be-khabri mein jo machal jaata Mein
Tu tery kaan se chup chaap nikal jaata Mein

Subah ko girtey teri zulfon se jub Baasi phool
merey kho jaaney pe hota tera Dil kitna malool

Toou mujhey dhoondti kiss shauq se ghabraahat mein
apney mehkey huey bister ki hur aik sliwat mein

Kaan se, Toou mujhey hurgiz naa utaara karti
Toou kabhi meri judaai na gawaara karti

(Majeed Amjad)
 

ECSTACY

Sabz maddham roshni mein surkh aanchal ki dhanak
Sard kamrey mein machalti garm saanson ki mehak

Baazooaun ke sakht halqey mein koi nazuk badan
Silwatein malboos par, aanchal bhi kuch dhalka hua

Garmi-e-rukhsaar se dehki hui thandi hawa
Narm zulfoon se mulaim ungliyon ki cher chaar

Surkh honton par shrarat ke kissi lamhey ka aks
Rashmeen baanhon mein choori ki kabhi madham khanak

Sharmgeen lehjon mein dheerey se kabhi chahat ki baat
Do dilon ki dharkanon mein goonjti thi ek sada

Kaanptey honton pe thi ALLAH se sirf ek dua
Kaash yeh lamhey theher jaein …
Theher jaein zara………………

(Parveen Shakir)
 

...ACHA LAGA

Bheer mein aik ajnabi ka saamna acha laga

sab se chhup kar woh kissi ka dekhna acha laga

Surmai Aankhon ke neechey phool se khilney lagey

kehtey kehtey kuch kissi ka sochna acha laga

baat tou kuch bhi nahin thi laiken "uss" ka aik dum

haath ko honton pe rakh kar rokna acha laga

Chaa'ey mein cheeni milaana uss ghari bhaaya buhut

zair - e lab woh muskuraata "shukria" acha laga

Dil mein kitney aehed baandhey thay bhulaaney ke ussey

woh mila tou sab iraadey torna acha laga

Uss udoo - e - jaan ko amjad bura kaisey kahoon

jab bhi Aaya saamney woh be-wafa acha laga